In tempore Sueborum trasládanos á nosa historia na Idade Tardo-Antiga, no ocaso do Imperio Romano, cando os suevos se instalan no Noroeste da Península Ibérica.
Aqueles feitos dos séculos IV ao VI cambiarán o concepto de xentes bárbaras herdado dos romanos.
A exposición estrutúrase en tres ambientes localizados no Centro Cultural Marcos Valcárcel, na igrexa de Santa María Nai e no Museo Municipal, para saber da chegada dos suevos, da orixe do cristianismo na época e de como convivían cos galaico-romanos da Gallaecia.
No Centro Cultural Marcos Valcárcel abórdase a chegada e instalación dos Suevos na Gallaecia que deu na creación do Reino Suevo no noroeste da Península Ibérica entre os anos 411 e 585, o primeiro reino bárbaro en Occidente, precedente pioneiro dos reinos da Idade Media e da configuración política da Europa actual.
Na igrexa de Santa María Nai abórdanse aspectos da cristianización e o territorio da Gallaecia sueva.
No Museo Municipal de Ourense, aspectos da convivencia entre suevos e galaico-romanos. Os cambios e transformacións na paisaxe urbana e rural da Gallaecia tardo-antiga non veñen motivados pola presenza e dominio político dos Suevos durante os 174 anos nos que exerceron o seu poder nestas terras. Foi realmente a propia dinámica evolutiva interna da sociedade galaico-romana a que marcou a transición entre o final do dominio romano e os comezos da Idade Media, un período que definimos como Antigüidade Tardía.
Ningún comentario:
Publicar un comentario